“Jasangarritasuna, guztion zeregina!”

 

Teknologiak eta zientziak etengabeko aurrerapena eta garapena sortzen digu. Baina gaur egungo garapen eredu hori ez da jasangarria: Munduko biztanle guztiek euskaldunok daukagun kontsumo eredua izango balukete bi planeta-lur eta erdi beharko lirateke guztion bete beharrak asetzeko.

Baina, planeta bakarra daukagu, beraz, zer gertatzen da?

  • Beste batzuk gu baino okerrago bizi direla.
  • Munduko baliabide naturalak, gureak eta besteenak, agortzen ari garela.
  • Lurra, ura eta airea kutsatzen ari garela gure hondakinekin.
  • Gure hondakinak geroz eta lur gehiago okupatzen dutela.

 

Etorkizuneko belaunaldien baliabideak erabiltzen ari garela eta azken finean haientzako uzten ari garen etorkizuna ez dela oso erosoa.
Beraz, gure bizi garapena guztiz jasanezina da. Horren aurrean tokiko garapen jasangarria bultzatu behar dugu.

Abiatu berri den 2020-2021 ikasturte honetan, orain arte Eskolako Agenda 21 programa gisa ezagutzen zena Eskolako Agenda 2030ean bilakatu da. Horrek guztion artean kultura berri bat sortzea eskatuko du. Ikastetxeko proiektuetan trantsiziorako eman beharko ditugun urratsak gauzatuko dira.

Eskolako Agenda 2030 berri hau, Nazio Batuetako Erakundeak (NBE) adostutako Garapen Iraunkorreko 17 Helburuetan oinarritzen da. Helburu hauek 2015eko irailaren 25ean onartu zituzten NBE osatzen duten 193 herrialdeek, nagusiki mundu mailan pobrezia desagerrarazi, planeta babestu eta pertsona guztien ongizatea bermatzeko.

Aurten agenda berria garatuko dugu helburu hauetan oinarrituta, hamabosgarren helburua izango dugu abiapuntua, LEHORREKO EKOSISTEMETAKO BIZIA: “Lehorreko bizitza babestea, lehengoratzea eta modu jasangarrian erabili dadila sustatzea, basoak modu jasangarrian kudeatzea, basamortutzearen aurka borrokatzea, lurren degradazioa gelditzea eta lehengoratzea, eta biodibertsitatearen galera gelditzea”. Helburu honen barruan, “BASOA” gaia modu egokian garatuko dugu ikastetxean.