XXI. mendeko gizartea ez da XX. mendekoa bezalakoa, beraz, hezkuntza metodologiak, edukiak eta azpiegitura ezin dira XX. mendekoaren berdinak izan, egokitu behar dute. Mende honen ezaugarri nagusienetako bat, zalantzarik gabe, digitalizazioa eta IKTen hedapena izan da, beraz, gure ikastetxeak aro berri honetara egokitu eta etorkizunerako prestatu behar dira.

2 urteko iraupena izango duen Sare Hezkuntza proiektuaren bidez aipatu helburua lortu nahi dugu. Horretarako gure ikastetxean bi ildo nagusi jorratuko ditugu:

  • Gaitasun digitalaren ikaslearen irteera profila diseinatzea eta ezartzea.
  • IKT heldutasun maila ertaina lortzea.

Gaitasun digitalaren ikaslearen irteera profila diseinatzea eta ezartzea.

Europar batasunak eratu duen DIGCOMP markoak, ikasle orok derrigorrezko hezkuntza bukatzean izan beharko lituzkeen gaitasun digitalak zehazten ditu. Datozen bi ikasturteetan gaitasun horiek nola eta noiz barneratuko diren plan baten barruan ezarri eta aurrera eramango dugu.

Europar batasunak proposaturiko gaitasun digitalak 5 ardatzetan sailkatzen dira:

  1. Informazioa
  2. Komunikazioa
  3. Edukien sorrera
  4. Segurtasuna
  5. Arazoen ebazpena

 

IKT heldutasun maila ertaina lortzea.

Gure helburuetako bat ikasleek gaitasun digitalak barneratzea baldin bada, ikastetxea digitalki prestatua egon beharko litzateke. Esan dezakegu, gaur egun, maila digital nahikoa dugula aipatu erronkari aurre egiteko. Hala ere, konbentzituak gaude, digitalki konpetenteagoa den ikastetxe batek errazago eta hobeto lortuko duela bere ikaslek gaitasun digitalak barneratzea.

Ikastetxe baten funtzionamenduak barnebiltzen dituen atal guztiak landuko dira:

  1. Irakaskuntza-prozesuak
  2. Administrazio-prozesuak
  3. Informazio- eta komunikazio-prozesuak